مرحبا ترحيبة ينشط لها القلب المعَنَى ..
مطلق:
مرحبا ترحيبة ينشط لها القلب المعَنَى
عدّ همال السحاب اللي بروقه ما تباتي
من يخاوينا نبا نرويه من هيل وبنّا
واشهدي لي يالنجوم اللي علينا مرقباتي
صياف:
بارك الله فيك ويجيك الخبر والعلم منا
مانسينا فعل سيفك فالليال الماضياتي
في نهار الخوف لا تطرح شدادك ياجملنا
لقمةٍ مره ,ولقمة كنها سكر نباتي
مطلق:
لاتشيل العفش في موترك حنّا ماوصلنا
دونكم حرة عتيبة والجبال النايفاتي
لاتخامسني يابو عرام بالكف المحنى
خامس اللي مايعرفون الصيام ولا الصلاتي
صياف:
الثبيتي قطع سلوك الروادي يوم غنا
شاعرٍ يكتب ويقرا والعلوم مصلحاتي
مانخامس واحدٍ لا شافنا قام يتمنى
وإن دخل في صف أهل ضلع الهدا راحو شتاتي
مطلق:
والله إنا ماحفرنا بالقبور ولا دفنا
لين حصلنا على الميت طيورٍ حايماتي
يالطيف الروح لو نخلط لبنكم مع لبنا
يشرب الظميان وتلين العروق اليابساتي
صياف:
لو نابك يكسر عظام البشر يمديه أكلنا
مار صابتك المصيبه فالسنون الاولاتي
الغصون اللي قطعت عروقها قامت تثنى
ليت مطلق من قبيلة حرب ويسوي سواتي
مطلق:
لك سنه وكسور قلبك يالسحيمي ما ارجهنا
واحمد الله يوم راسك من تحت كم العاباتي
الحروب اللي على سيف البحر ماهم بمنا
ربعنا اللي من ورا الحد القصيم اليا مراتي
صياف:
أنت تخبرنا نزود فالدهان اليا دهنا
مار لاتجرح شعور الناس من كثر الشماتي
