محاورة بين الشاعرين مطلق الثبيتي -يرحمه الله- والشاعر خلف بن هذال العتيبي بحضور صاحب السمو الملكي الأمير فيصل بن خالد بن عبد العزيز، في المغترة بالرياض وكان البادئ بها خلف بن هذال:
خلف بن هذال:
سلام مني للأمير وللثبيتي وللحضور
والليلة الليلة نباها عكّةٍ بدهانها
أمَّا تجيب ام الشحم ولّا تجيك أم الخصور
تضحك عليك وتنهبك وتَّدخلك فا احضانها
مطلق الثبيتي:
يا مرحبا عني وعن صقرٍ وجاذبته صقور
فا الحلة اللي كل أبونا فزعةٍ من شانها
دوب ابتدى المعنى وبالله لا تلف ولا تدور
واليا لقيت الغالية عندك دفعت أثمانها
خلف:
خابرك يا مطلق شجاع ولا على مثلك قصور
لكن أشوف الحيَّة الرقطا تمد لسانها
أبشر بمعنَى ما يسير الا على سبعة بحور
من بحر تمشي في بحر والناس وسط أوطانها
الثبيتي:
يا اللي تولع فا الحطب عَيّن يفيحن القدور
والمعركة بين الفوارس ضيَّقوا ميدانها
واللي يشَيِّل فا الجنايز مثل حفار القبور
وأنا ليا شفت الجنازة ما سرقت أكفانها
خلف:
إن كان يا رجَّال ما تقدر على جسر العبور
جنّب عن الساحة يجيك مشّيطٍ شيطانها
والنار في خشم الزناد ولا تغرك يا غرور
بعض الغرور يضيَّع العربان عن سلطانها
الثبيتي:
يا طير يا اللي من ورا باريس عانقت الطيور
على جناحك ريش ما ادري ويش من جنحانها
لو برقعوك أهلك عن المقناص قطَّعت السيور
وان شفت لك صيده على البيداء وقعت أوزانها
خلف:
عانقتها قبلي وأنا في نجد مجروح الشعور
واضفي على جرَّتك خبنة بدلتي واردانها
هيّضتني ذيك السنين وصرت يا مطلق غيور
وانا مركبك الركاب اللي تغط أرسانها
الثبيتي:
انته إليا فلَّيت ما خلَّيت للجيعان سور
والشجرة اللي جيتها تصبح يبوس اغصانها
وأنا تراني يا خلف دايم على الدنيا صبور
صابر على ناصر واخوه وناس شاني شانها
خلف:
قبلك تصلي لك صلاة بلا وضوء ولا عفور
تظلم هل الذمة ونفسك غالٍي ميدانها
لو ان فيصل يرسلك عوَّدت مسحوق الذرور
ماعاد تفتح عينك اللي ترتعش حجَّانها
الثبيتي:
يالوادي اللي دايمٍ سيلك على المغرب حدور
جعل المزون الغرّ فوقك ما تهل أزمانها
أنا أعرف عيال البطون ونعرف عيال الظهور
وليا لزمت أم الكبائر ما ذكرت اخوانها