محاورة بين الشاعرين مطلق الثبيتي والشاعر رشيد الزلامي . يرحمهم الله ..
الزلامي:
على خيرة الله جيت اعلم واريد علوم
واخيَّل سحابة يجهر العين بارقها
وانا اشوف بالقمَّة تكاثف سبور القوم
خلف يجمع القوة ومطلق يفرقها
الثبيتي:
عسى خير يا طيرٍ علينا كسرت الحوم
نبا نعرف الساعة ونحسب دقايقها
انا ما اعرف الظالم وانا ما أعرف المظلوم
ولا شفت نور الشمس من يم مشرقها
الزلامي:
غزيت امس يا مطلق وحنا غزينا اليوم
لكنك تسابق كل غزوة وتسبقها
وانا لوَّ ابيح بسر في خاطري مكتوم
أظنِّك تشب النار والناس تحرقها
الثبيتي:
ليا مات منكن واحدٍ قلت يا مرحوم
ومن يسرق العربان لا بد نسرقها
تراك البلا والشر يا الفيل أبو زلوم
تسوق المطية لين ذابت مطارقها
الزلامي:
انا لوّ اطيعك ما بقى في سماك نجوم
إلك نيةٍ في الكون ودك تحققها
على الحُرْ الأشقر دايمٍ عفشكم محزوم
ولك بندقٍ في راس كورك معلقها
الثبيتي:
يروح النميري مير ما يترك الخرطوم
ومن يعرف الخرطوم لا بد يعشقها
أنا كيف ابا أصبر فوق ريح البصل والثوم
وأبا اروح عن بعض المشاكل وافارقها
الزلامي:
انا خابرٍ قلبك معلَّق باخوك التُّوم
تطير الطيور وصبح ترجع وتلحقها
تحاول على صُمْ الصفا تخلق المعدوم
وإذاعتك لو جابت نبأ ما نصدقها
الثبيتي:
ترى العود ما يصبر عن الفاس والقدوم
لكن الثياب الضافية لا تشققها
يميع اللحام وينقطع سلكك الملحوم
وتركب على ظهر السفينة وتغرقها
الزلامي:
ليا صحت ولا نحت مالك عن المقسوم
لعلِّه سفر وارد عراوي وسايقها
بعد جبت لك سمن وعسل جبت لي جرثوم
وسلعة تجمركها وسلعة تفرقها
الثبيتي:
أنا لي هدف فيكم ولي دربي المرسوم
أبصبر عليها لين تبدي حقايقها
زرعت النخل وأسقيه لكن عود دوم
بعد ضايقتني يا عسى الله يضايقها
…
