سلام الله على من جابنا ذكره ومرسوله ..
الثبيتي:
سلام الله على من جابنا ذكره ومرسوله
عدد نوء المزون اللي بها برقٍ ورعادي
شليويح المطيري يوم شفته عزني زوله
واثره الشجرة اللي عرقها سابح مع الوادي
المطيري:
هلا يا مرحبا نبدي فيه ونقوله
نيابة عن مطير الحاضرة وآلاد عبادي
شليويح المطيري ماشٍي في الدرب بنعوله
ولا حطَّ القدم حافي لعل الدرب ينقادي
الثبيتي:
ألا يا زينها لو تصبح البيبان مقفولة
وتمسي يالمطيري من ورا البصرة وبغدادي
يا راع الشلّة اللي عن عيال الخير معزولة
بعد سويتها فينا يبالك حرب واجهادي
المطيري:
عرفت الغازكم من عصر والالغاز محلوله
كلامك فالمسجل لا تشغَّل موجة الرادي
أنا لي شلةٍ في دربها ما هي بمشلولة
بعدها يا الثبيتي لا تحرّك كورة النادي
الثبيتي:
أبى اربّي حرامٍي يشيل التمر بحثوله
وهو من عادته ما يسرق الا تمر الاجوادي
أبوكم ما تسنَّع وأمكم قشرا ومهبولة
ليا ميَّزتها من قشرها ما عاد تزتادي
المطيري:
علام الحضرمي قدام جيرانه كفا فوله
يعقب دلته ويجيب للضيفان برادي
أنا أميّ صاحية وأمك من الأيام مشغولة
ولا تسمع كلام أمك نهار تصيح وتنادي
الثبيتي:
زعل راع الونيت وضاع له عشرين صامولة
ويوم انه رضا وليا الفرامل سلكها غادي
حبال الخير بين الناس ممدودة وموصولة
ولا تقدر تغيّرها ليا شفت القمر بادي
المطيري:
أقصّ الجُرّة اللي من زمان العام مدهولة
وأثر طبع الحرامي يختلف عن طبع الأجوادي
أنا خابرك تثني كان نار الحرب مشعولة
لكن اليوم عان القوم لك في كل مرصادي
الثبيتي:
رموشك يا المطيري من دموع العام مبلولة
نبا نشعبك في شعبان ونجَمّدك في جمادي
ليا شفنا الغناوي كل يوم يقِلّ محصوله
قطعنا عن نسناس الهوى والشرب والزادي
المطيري:
ليا حيمرت عينك عندنا بالكحل مكحولة
وانا بشب ناري كان شفت القدر ما جادي
أنا ماني بشعره من عجينة خبل منسولة
انا دكتورها حتى نداوي كل الأكبادي
الثبيتي:
ألا يا موترٍ حطّوله الشاصين مدبوله
لكنّه لا مشى فالدرب في ممشاه متحادي
أنا أعرف القلوب اللي من الوهام مدخوله
أجيب الها الدواء مير الدوا والطب ما فادي
المطيري:
أنا بنشدك عن هاك الونيت صحيح منهوله
بعد ما حوّل السواق ركبه غض الانهادي
أنا ماني بماشي غير مع سكه ومدهوله
لكنك قصّ دربك يا عتيبي وانصح الغادي
الثبيتي:
شليويح المطيري مدوخ الغربان بطبوله
ويا ليته مع الغزي وجنب عزيز البادي
ولا يا زين زول الشيخ والذرعان مفتولة
ولكنه يطوف ويستعي فالشِعب وجيادي
المطيري:
تغيّر صاحبي يوم السواري وقّعت حوله
سلامه يا الثبيتي وابشر انك واصل المادي
ليا زعل الثبيتي من زمان العام قولوله
نبا نكسيه من سوق الرجال ثياب وجدادي
…
