عداد نوٍ حنّ رعَّاده ويشعل بالبروق ..
الثبيتي:
عداد نوٍ حنّ رعَّاده ويشعل بالبروق
يا مرحبا ترحيبٍة كل العرب يوحونها
هلال دايم مع رفيقه لا كذوب ولا صدوق
علوم يبدعها ويصنعها ولا أعرف لونها
هلال:
دام البقاء ياللي ترحب فالغروب وفالشروق
شفت السباع اللي بضحكتها تشاف سنونها
يا زين جابة صاحبي لو كان ما فيها حقوق
لكن باقي وحده ما دونها ما دونها
الثبيتي:
خَلّك على العادة ترى ما انته ختول ولا سروق
خل السريقة للرجال اللي وساع بطونها
إن طال عمرك يفطر الصايم وتبتل العروق
وام القرون العوج لا تومي عليك قرونها
هلال:
يا ما نذوقك العسل لاكن كنك ما تذوق
عودت مثل اللي يشاف الزاد مع حنونها
ياللي تمدح بالغنائم لا صبوح ولا غبوق
دفَّتكم قرون القبايل وانتم تدفونها
الثبيتي:
يالفارس اللي في يديك الرمح وحصانك سبوق
ما اشوفك إلا سدها ما قط شفتك دونها
والحية اللي سمَّها عيَّت تليّمه الشدوق
شفت الجرب يرعى ظهرها والرمد في عيونها
هلال:
انته من اوساع النَّهايا لا تحمَّق يالحموق
ما ني بقايل وحَّده حتى العرب يقلونها
والحية اللي سمها في بطنها ما هي عشوق
واللي طمع فيها مع الغبشه ينوش جفونها
الثبيتي:
والله لولا حشمة الغالين من برقا وروق
لا ازورها واحط جمرتها على غليونها
والباعة اللي صاحبي سيَّربها في كل سوق
لا أني بشاريها وجعل الناس ما يشرونها
هلال:
ياللي تدور للمصائب والمصالح والوفوق
ان طعت شاري خل حبتها بطن ماعونها
إن كان في راسك شقيقه لا لزمناها تروق
تشوفها عسرة ولكن عندنا يا هونها
…