سلام يا من حضر والعلم قدام ..
الثبيتي:
سلام يا من حضر والعلم قدام
واللي يسافر معي تتعب ذلوله
أرسلت لي يا علي عشرين عزام
وإن كان عندك سنع عطني حلوله
الهجله:
يا مرحبا يا هلا والمشي بانظام
لو كان مطلق يقول اللي يقوله
يا ضيفنا ها السنه قد جيتنا العام
والوقت تعرف عداله من ميوله
الثبيتي:
حنا لدعوتك نمشي ليل الاظلام
ومعزب الضيف ما شفت محْصوله
والغيث يسقي اليمن ويسقّي الشام
وليا نزل عندكم ضاعت سيوله
الهجله:
مطلق ليا أسرع يحطم كل الأرقام
أسرع من الريح لو تثقل حموله
يشكي من الجوع لوه مكرم إكرام
ويصيح والسكريّه في حثوله
الثبيتي:
أكبر مصيبة ليا خالفت الأحكام
الحر يعرف طلوعه من نزوله
قلنا احتزم في اللزوم وشد الأكمام
لكن لا جبت فيد ولانت حوله
الهجله:
حنا نهجنا على منهاج الإسلام
والعلم جيناك به على أصوله
لكنك إحذر لا تضرب ضربة الفام
يبعد عليك العنب ولا تطوله
الثبيتي:
يا كثر حيلاتكم يا عيال عزام
كلٍ يجيب الهوال الله يهوله
يا ليت يحكم عليكم حكم الاعدام
رجالكم في الوطن ما طيق زوله
الهجله:
أنته تنازل وحنا حضنا قام
والرجل ما يعرف إلا من فعوله
اتعيش واتموت وانته حاف الاقدام
لا انته نبي الزمان ولا رسوله
…
