سلامي على أهل الديره اللي هواها زين ..
الثبيتي:
سلامي على أهل الديره اللي هواها زين
وانا أعرف هواها يوم هبن الانسامي
أثر شوف ميشع في دياره يسر العين
وفي ديرة الأجناب يقعد ولا قامي
ميشع:
هلا مرحبا ترحيبةٍ تكمل التثمين
عداد الليال وعد مقبلة الأيامي
بتسرق عقول الناس مير العرب صاحين
هوى الدار شين أقوى من الميسم الحامي
الثبيتي:
لو انك تخاوينا ترى الوحدة ثنتين
وتسلم وتعرف مثلنا درب الاسلامي
لكنك مسوي مثل راكان أبو حثلين
يعرف اليمن لكن ما يعرف الشامي
ميشع:
انا ما أتبع الغاوي ولا امشي مع الغاوين
أبا لي خويٍّ يبتل الدرب قدامي
أحب الرفيق اللي يقدّم لي التامين
ولا ابغى تقلّطني على زاد الايتامي
الثبيتي:
ويا شايبٍ ما تعرف الا الشريف حسين
عيال السعوديه على الدار حكَّامي
أنا خايف القاسي بتال الزمان يلين
ليا شاف ذيك البندقيه مع الرامي
ميشع:
يا الثبيتي تجر الحبل فوق المحاله
تسحبه بالرضا والا تجره جباري
باقي العلم خلّه عنك ما لك وماله
في يدين القروم موردين الشباري
الثبيتي:
لا أنت صاحب سمو ولا أنت صاحب جلاله
أنت شاوي حياتك كلها في الصحاري
جيت أعلّمك واورِّيك درب الشكاله
ولو شليويح يدري بالخبر جاك ساري
ميشع:
واحدٍ قبل نوصل له جفل من خياله
ما يحق إله يضحك مع سباع الغداري
طول الأيام واقف عند باب البقاله
ما يعرف العلوم الا أشتري ياشواري
…
