أنا نصحتك لا توهق ثم تجيب ام العطر ..
ميشع:
أنا نصحتك لا توهق ثم تجيب ام العطر
مير انتبه للثانيه لا عاد تقرب حولها
لا تبعث الميت ليا منه قبر وسط القبر
ترى الليالي للجرود مولمه مرسولها
الثبيتي:
انته تمنى الثانية لكن دهواك الكبر
ترى الجبال النايفه دايم تروع سيولها
أنا أعرف المصري ليامنه زعل وأعرف مصر
وانا أعرف الديره وأعرف طلوعها ونزولها
ميشع:
ترى الحذر يبغى الغريم وما يفك من القدر
لا بد ما تختشك الايام وسط حثولها
ان كان قد سافرت لاهل مصر ما عندي خبر
ماني بناشد عن مصر وسبورها وحقولها
الثبيتي:
أوحيت صوتك يالمطوع يوم تذن من عصر
والناس فالمسجد على عينك تدق طبولها
وان عاش راسي لافتح الخزنه واسوي لك قصر
قدام لا تقرب من الجره وتاكل فولها
ميشع:
أنته عساك تعيش وانا باحصر الدعوى حصر
ما أحب أمير القريه اللي شرها بدبولها
عندي بصر في حلتي والناس كلٍ له بصر
عسى نخيل الغرب دايم ما تموت فحولها
الثبيتي:
العين تضحك كل ما باين لها وجه القمر
واليا بدى لي تقفي الظلمه تجر ذيولها
عينك تبى ترقد وانا عيني مطاولها السهر
شفت الفوارس يوم تسرج للحروب خيولها
…