سلام يا للي يسلي شوفهم في كل الايام ..
مطلق الثبيتي:
سلام يا للي يسلي شوفهم في كل الايام
وأعشق محاضيرهم وأحضر لهم من غير داعي
ما يختلف دينهم طول السنه عن دين الاسلام
ولا تعلق مزاودهم على النقل الجماعي
حبيّب العازمي:
يا مرحبا بالمسلم عد ما خطنّ الاقلام
في الحله اللي رعاها من رجال الجود راعي
يا مطلق الوقت يجري مثل ما يجرن الاقدام
مير الطبيعي طبيعي ما يشابه للصناعي
الثبيتي:
يا محمل أهل اليمن خل الطريق لمحمل الشام
وان طعتني لا تفكر فالهجوم وفالدفاعي
هاذي السنه يا حبيب ما شواريها كما العام
واللي رقد له سنه وكسور صار اليوم واعي
العازمي:
يا محمل الشام صبرك لين تذري بعض الانسام
ويطيح حبل السفينة منك ويطير الشراعي
هذا السنه يا الثبيتي لو يطير الطير ما حام
والأرض ما فيه ياكود العقارب والافاعي
الثبيتي:
مات الخميني وبالشنا خبيث الذكر صدام
لكن والله لو يأمر ترى أمره ما يطاعي
شفت الكهارب وجيت لحفلهم من دون عزام
واللي نوى الشر أضنه لا يخاف ولا يراعي
حبيب:
مات الخميني وباقي صاحبه عباد الأصنام
دخَّلتنا يا الثبيتي فا المشاكل والنزاعي
وان كان حظ العرب ما قام حنا حضنا قام
ابرك من اللي حياته في نزول وفارتفاعي
الثبيتي:
يا راقد الليل كله وش حصل صدقت الأحلام
وراك ضيقتها يا ذيب ودروبك وساعي
وان كان ما سارت الدنيا على قانون ونظام
حطيت سيفي على راس الثنيه والرباعي
العازمي:
ماعاد نامنك لا تزرع لنا فا الدرب الالغام
واكثر كلامك يجي وسطه مثل شوك الشكاعي
وأنا على رحلتي فيما مضى عزَّام جزَّام
ماني زبونٍ لحاجه لا تسام ولا تباعي
الثبيتي:
يا راعي القلعه اللي فوقها رفن الاعلام
لو طاح منها حجر يا الشيخ رزَّيت المناعي
لو بعت بندقك عقب حزامها ما عاد تنلام
اظهرت للشمس زبدك يا حبيب لين ماعي
العازمي:
الظاهر أن الثبيتي ما يغره غير الاوهام
اكثر كلام الثبيتي فا الاذاعة ما يذاعي
وان كان راح الحزام يجيك فيه حزام وحزام
أحسن من البيدي اللي رقعوها بالرقاعي
الثبيتي:
عليك عشرين ثوب مفصله من طيب الخام
وأقيسّ أنك عشاء للذيب بعد الذيب جاعي
يا كبر موج البحر لكن أشوفه عوَّد أقسام
واليا تقسم مشت فيه البواخر والسواعي
العازمي:
أثيابنا يا الثبيتي بالشرف ضافية الاكمام
واهل الشرف ما يعرفون النميمه والخداعي
…