يا سلامي على أهل الطيب وأهل الجميله ..
الرياحي:
يا سلامي على أهل الطيب وأهل الجميله
عد وبل الخيال اللي ترادم سحابه
مطلق الشيخ قام يحيل مع كل حيله
يلتفت للبقوم وطمعته في عتابه
الثبيتي:
مرحبا عد نوٍ جاك يدرج بسيله
في محلٍ لضيف الله ما انصك بابه
ولعو يالبقوم النار راس الفتيله
حضن ما عاد تحماكم زوامي هضابه
الرياحي:
الرجل غدرة الأصحاب ما تستوي له
كيف يقدح بكبريته ويحرق ثيابه
حضن مضمون مع طول السنين الطويله
ما يحرّك حصاه ولا يدنس ترابه
الثبيتي:
أنت في حضن ترضع صافي من حليبه
أما أنا فوق عدٍ ما صفا لي شرابه
كل واحد مع الايام ياخذ نصيبه
وأنت يا خندفي وش قوّمك مع شبابه
الرياحي:
ودي أفطمك عن هرجٍ بصدرك تشيله
واطرحك للأسود الكاسره والذيابه
أنت ودك بقرص وسمن بأيه وسيله
تهجد المؤمن الممرح وتفتش زهابه
الثبيتي:
حضن ما يستوي لك وانت ما تستوي له
أنت قوس نحرك به سلوك الربابه
انتم أصحابنا يا كبرها من فشيله
الجمل حطّكم ما بين ضرسه ونابه
الرياحي:
مجلسي ما يفكونه شيوخ القبيله
الثلاثين قوه والثلاثه عصابه
الجمل ما تقوّمه العظام الهزيله
جاه علمٍ وكان يريد يحسب حسابه
الثبيتي:
واحدٍ مع طريقه ما اتعرض سبيله
أتعرض لجحر يقرص الناس دابه
أحمد الله تراني فيك صانع جميله
يوم أخليك تؤمن بالنبي والصحابه
الرياحي:
ان تعرضت جحر الداب ليلتك ليله
من يزر الثياب ومن يداوى الإصابه
ما أنت مثل الرسول ولانت صاحب فضيله
غارتك للبعيد وضحكتك للقرابه
مطلق الثبيتي:
يا مرق يا حليب ليا غديتوا عبيله
سيَّروكم على حزمٍ تقطع سرابه
تمرةٍ جوف عيبه في يدينٍ بخيله
كل ما جاع من ينقلك فتّش عيابه
الرياحي:
ما دريت انها طب الكبود العليله
أشرب السم يوم السم قام يتشابه
نخلة الشيخ ريانه ودايم ظليله
شوكها في نحرك وتمرها وش تبابه
الثبيتي:
يا يتيمٍ نشف دمه ويابس صميله
جر صوته بليل وضاع في وسط غابه
العتيبي ليا جاكم بجيشه وخيله
من يطرف من العربان يغدي نهابه
الرياحي:
كلمتك ضايعه ما عاد فيها عقيله
راح فكرك خراب وراح عقلك خرابه
لو عتيبه تعذر في ثبيت وحصيله
ما لحقها ملام ولا لحقها طلابه
الثبيتي:
والله أنا نعرف الثور وأخته حسيله
لا رعى الله ذاك الثور واللي غزى به
يا جمل ثقَّلوا حملك وتزري تشيله
كل من طاوله سقمه سواتك غدى به
…