يا مرحبا في حلة في ذراها يامن الضيف ..
مطلق الثبيتي:
يا مرحبا في حلة في ذراها يامن الضيف
في دار ابو خالد عسى الله على عزه يديمه
الشاعر الي ما يجينا مع المعنى على الكيف
نبا نسويله قبر بين رابغ والقضيمة
فيصل الرياحي:
دام البقا لك بالنسيابة عن اهل الخيل والسيف
اهل الديار بها الرجل له حشمه
يالي تقول السالفة ما يعذرنا التواصيف
وانت استعنت بمن يحبس الشياطين الرجيمة
مطلق:
سبحان من خلاك تنزل مع الحربي على السيف
والصحبة الي بينكم طاريه ماهي قديمة
ان كان واليا ولد شيخ وتعرف المعاريف
احرص على صياف واعطه ولو ربع الغنيمة
الرياحي:
انا وصياف استلمنا مع الحرم مع مسجد الخيف
وانته ورا مع ذاك صوب الشفا سكان خيمة
ما دام فيصل حي مابه على فيصل تخاليف
ما عاد احسب حساب دمعتك يالبنت اليتيمه
مطلق:
بكره شجاري حضن تنصاك وتلج الغطاريف
تحسبك صرت اليوم ولد الملك والا رحيمه
لو استرحت مع المعنا وقصرت السواليف
يحماكم الله ما يجيكم لا خلاف ولا ظليمة
الرياحي:
بكره نشب بين الحطب والعصف والليف
اما تطب النار ولا تقفي بالهزيمة
لا تنكر الي حرفك في زمان فات تحريف
خلاك تعذر في عتيبه يابو جبهه وسيمة
مطلق:
كم واحدً فينا يورا وراح من امس ما شيف
كان ادعج العينين واليوم ابو عين كريمة
الله حسبي فوق مفلح و ورا فيه واعيف
ابطيت يامفلح وحملتني ذنب البهيمة
الرياحي:
الظاهر انك لا تصرف ولا تقبل تصاريف
لو كان رمشك هايما بالقلوب المستهيمة
جتك الجيوش الي تنزلك من روس المشاريف
تاخذ هروج سمان وترد بهروج عقيمة
مطلق:
لا و حسوفك ياقليل البصيرة بالتحاسيف
يا شاعر ترقب من الخصم وعظامك سليمة
العين عيت تبرح الدرب من كثر الخطاطيف
من ركب الجنحان والريش في طيورٍ غشيمة
الرياحي:
غاص بك المركب بوسط البحر ماله مجاديف
حتيش لاو تزعل على الموت وتعزي حليمة
ماعاد تصلح غار في خدمتي شغال تنظيف
لو شرهو ربعك عليه وطحت من الهظيمة
مطلق:
جاك المطر والريح تحداه ومزونه مراديف
منته بسالم لو خليت للذيب الخريمة
بعض السوالف خلها لا تكلفها تكاليف
البال طاب من التهامي وسمنً في يديمه
الرياحي:
لو نكسر ضلوع الثبيتي مثل كسر الصفاصيف
ضلا الثبيتي ناسي الله ولا ينسى خصيمة
والله مالك من ورانا يابو زهره معاريف
مغار تحدانا نسوي على خدك وسيمه