يا مرحبا في مرحبا من صافي البال ..
الثبيتي:
يا مرحبا في مرحبا من صافي البال
عداد نوٍ يسمع الساري رعوده
يا زيد تسوى عندنا عشرين رجال
يا الصاحب اللي كل ما نزعل نروده
زيد:
دام البقاء يا اللي نزل في خير منزال
لو شان معه الوقت ما بيّح سدوده
انته تقوله والعلوم أصناف واشكال
وانته على هدَّاج ما يشكي وروده
الثبيتي:
بنيت فلَّه للضيوف وظلها مال
يا الصاحب اللي ما عرف بخله وجوده
واقيَّس انك يا كبير الراس محتال
ما واحدٍ من فزعتك تقدح زنوده
زيد:
حنا ليا جاء الضيف لابس بشت وعقال
اردانا واحد فالكرم يذبح قعوده
أنا لو اني مستمع في كل عذال
ما كان أعَمر البيت واطوّل عموده
الثبيتي:
ماعاد به للحبل نقَّاضٍ وفتال
عشرين عقده في آخر الحبل معقوده
لكن صفّط عفشها يا طيب الفال
وش شالها من راس تنوره لجوده
زيد:
جعل الخطر يا أصحابنا العتبان ينزال
من شان ترقد با الهنا النفس الحسوده
حنا نقدّم للكريم ريال بريال
ما أحدٍ يلوم المجتهد تشكر جهوده
الثبيتي:
يا سرع ما قفلتها بكره با الاقفال
واشوف زيد الدمع يذرف مع خدوده
الحلَّه اللي ما تحتها ستر وظلال
تمسى بكل الخير والصبح مهدوده
زيد:
حنا اليا جات اللوازم نرخص المال
لكن فعلك يا ثبيتي لا تعوده
هذا لو اني مستمع فا القيل والقال
كان أزبن الرجال واكافي جدوده
الثبيتي:
المال ما ينفع بها في بعض الأحوال
يوم الجنازة قبلها طاحت لحوده
لا والله الا قام دلوك يضرب الجال
يا الضابط اللي قام يشمت في جنوده
زيد:
المشكل اللي ينتهي من دون حلال
مثل الكلام الي يشكَّك في شهوده
حنا نشوفك فا الطريق اقفاي واقبال
وتشب ضوٍ ما عرفنا وش وقوده
…