سيري يا رجل مع ممشاك والطرقة طويلة ..
الثبيتي:
سيري يا رجل مع ممشاك والطرقة طويلة
كل رجلٍ مع طريق الخير ما يحفى قدمها
قوم يا ملفي ترى ما عاد لي فالعلم حيلة
العرب فالريع من قبل أمس رزت لك علمها
المورقي:
يا ثبيتي يا ثبيتي سرَّها بأحسن وسيلة
والرجال اللي سواتك تحترمني واحترمها
خل عنك اللي يشب النار في خشم الفتيلة
الليالي حطته ما بين منكبها وفمها
الثبيتي:
الجمل ما شال حمله مير ما ادري من يشيله
واثر عينك ما تشوف الدرب وادنى مالطمها
شايلٍ ختم القبيلة وانت ما عندك قبيلة
ما معك غير الجمال اللي نبا نقلي شحمها
المورقي:
الجمل ينقل حموله بين يوم وبين ليلة
تدري أنه ما ظلم غيره ونفسه ما ظلمها
عزتي للي يحوّل للمخاطر عزتي له
ما يعرف الحية الرقطاء ولا يعرف نسمها
الثبيتي:
جيت ابا أنصح واحٍد بين العرب ضيع دليله
ثم عوَّد للعلوم الثانية معنا ختمها
ما يحوّل للمخاطر غير رجال الصميلة
والضعيفة خلها تسرح وتضوى مع غنمها
المورقي:
أنت ولد آدم على ذرّيته ما انت بوكيله
لا تعاين في قريش ولا تعاين في صنمها
ما دريت ان العرب برماح وسيوفٍ صقيلة
السيوف اللي تعزل عظام رجلك عن لحمها
الثبيتي:
ما غبنَّي غير رجلٍ بالسمن ينضح صميله
ان لقيله خلفةٍ ما فوقها وسمٍ وسمها
واحدٍ ما يستوي لي فالعرب كيف استوى له
طوَّل القصة على العراف حتى ثار دمها
المورقي:
خلَّها من بيننا والرجل لا تطلع حثيلة
انت ما تدري لغيره ناس ما تبرد لقمها
ويش تبغى بالشداد ويش تبغى بالأصيلة
والمطية يا ثبيتي قد خطمها اللي خطمها
…