سلام بردةٍ تبدي بها الروقة على برقا ..
المورقي:
سلام بردةٍ تبدي بها الروقة على برقا
وحنا صف واحد كلنا روقي وبرقاوي
أنا أشوف الثبيتي صار لا ينزل ولا يرقا
دروبه مع جبال شامخة ما هو بمتساوي
الثبيتي:
عدد نوَّ السحاب اللي وراها البرق يتعرقا
ألا يا مرحبا يا ذيب يا اللي جيتنا ضاوي
تقوله والثبيتي يعرف أهل الغرب والشرقا
دروبه بيَّنة بين العرب ما يتبع الغاوي
المورقي:
ليا هبت ذعاذيع الهبوب وناحت الورقا
ألا يا شاعر الثبتان الا يا ذيبك العاوي
ترانا يا الثبيتي ما نوينا البعد والفرقا
لكن اللي تكلم فالسوالف ويش هو ناوي
الثبيتي:
تعبنا فالحديد وكل شيء نطرقه طرقا
اليا حطيت له عدلين مال وطاح متساوي
أنا خابرك طيّب ما تعرف الغدر والسرقا
لكن المشكلة ما تفهم القصة من الراوي
المورقي:
كثير الناس تضحك قدمهم وقلوبهم حرقا
لكن اليا وليت القلب لا ترحم ولا تاوي
أعرفك يا ثبيتي تحسب انّا فالبحر غرقا
ترى كلٍ في كسب المرجلة عشقان ومهاوي
الثبيتي:
علومك يا العتيبي روحت فالجبَّة البرقا
عليكم يضحك الهندي عليكم يضحك الجاوي
أنا ما اذمكم يا ربعنا وعيونكم زرقا
ليا جاها المرض ما جالها دكتور ومداوي
…