جيت فازع بسيفي واشهره واعتزي به ..
مطلق الثبيتي:
جيت فازع بسيفي واشهره واعتزي به
لو تقولون مال السيف ذا الليل داعي
صياف الحربي:
البقا يالعتيبي والعلوم العجيبة
لا تطول ذراعك ثم اطول ذراعي
والله انك من البارح بدت فيك ريبه
كل ما حن بابورك رفعت الشراعي
مطلق
يوم تنصب تبي لك من جهينة خطيبة
وانت ربعك على راسك تجر المناعي
ان رضيتوا مصيبة وان زعلتو مصيبة
ياهل الحوت يالي تركبون السواعي
صياف
كيف اناسب جهينة والبنية غريبة
يالله انك تشيل كراعها عن كراعي
لا تحفر القبور وتدرّق فالنصيبة
انتبه للثنية وانتبه للرباعي
مطلق:
لك سنة وانت يالحربي تخض الغبيبة
واللبن صار كله زبد والزبد ماعي
يكبر الجرح في جنبك وتلقى طبيبه
كان ماوحيت في بيتك فحيح الافاعي
صياف:
انتظرني وزيرك فالليل القريبة
ثم اسرحك فالمعزا واسميك راعي
كل ماشفت لك مخلوق فتشت جيبه
وان تعرضت نايم تزهمه لين ياعي
مطلق:
حين الديس ساعه لين يركد حليبه
قبل نفطمك وانت ماتكب الرضاعي
انت راع الطروش وكل علم تجيبه
مير نص الرعية في بطون السباعي
صياف:
كل من مد لي كفه يحصل نصيبه
والله اني لخليكم عشا للضباعي
الرعية مثل سبيل طفح مع شعيبه
نص يكفيك لو النص الاخر يباعي
مطلق:
كل رجل سواليفه نميمة وغيبة
ان طلب ماعطي وليا ومر ما يطاعي
لا تدوّر ولو يغدي لك مية ذهبية
وانت تعرف هجومي وانت تعرف دفاعي
صياف :
اجتمعتوا ورحتوا تمرة وسط عيبة
ثم حول في وسط البحر الاحمر وضاعي