هلا مرحبا ترحيبةٍ عَدّها معدود ..
حبيب العازمي:
هلا مرحبا ترحيبةٍ عَدّها معدود
تحيّه قبيليّه علىٰ الدّين والمِلّه
ولا يا الثّبيتي قرّب الجمر للبارود
ولا يدخلك خوفٍ ولا يدخلك ذَلّه
مطلق الثبيتي:
يدوم البقىٰ يا ربعنا ما عليكم زود
عداد الثّعول اللّي مِنَ العَرش مِنهَلّه
انا ما رضيت اتْزِلّ عن حَدّك المحدُود
وتكفىٰ معاميلك وتخرج من الحِلّه
حبيب :
انا عارف الغايه وانا عارف المقصود
ولـٰكنّ معكم عِقدة الحبل مِنحله
وحِنّا نحاول ما نبىٰ البطش والمنقود
نبىٰ ناخذ الفنجال الاوّل مِن الدّلّه
مطلق :
حضرنا مع الحِضّار وامّا انت يا المفقود
تِعِلّ القلوب البِيض يا علّك العِلّه
تشيل العصا للذّود منته بِراعَ الذّود
وراعيه رَجلٍ ينقل السّيف ويسِلّه
حبيب :
انا غايبٍ عنها وكَنّي معك ماجُود
على شان انا قبلك هذا الدّار مِحتلّه
ولا يا ثبيتي معك حِجّه بدون اشهود
وِلِنْ قلتها قالوا لك النّاس لاَ بِلّه
مطلق :
انا اعرفك جندي زين من عسكر ابن اسعود
لـٰكنّك علىٰ القايد ترىٰ زَلّتك زَلّه
ترىٰ ظَلْم واطرافه تحت دِبرة العَبّود
وبعض العرب في ظَلْم مـَ ابغىٰ لهم شَلّه
حبيب :
وانا خابر اِنّك واحدٍ مِن عيال العَود
ولـٰكنّ مات الدّاب بـَ السّم فـَ الصّلّه
وَلاَ يا هَلِ اِعقَيله علاكم مطر ورعود
ولا تهدمون البيت وانتم تحت ظِلّه
مطلق :
ولا ياحبيّب ماشِ فِطحه ولا عمرود
ولا هي بزينه تشلَح الثّوب وتشِلّه
انا احبّكم وانا علىٰ حبّكم محدود
ولو كان منتُم خير من بعض خلق الله
حبيب :
انا والله انّي خابرٍ ما وراكم فود
وثوبي علىٰ حِلّه وثوبك علىٰ حِلّه
وحِنّا نحبّك لاَنْ جات اللّيال السّود
وذالحين حِبّك صار كِثره مِثل قِلّه
مطلق :
ترىٰ الحِمل ما يشتاله الحِقّ والمفرود
يباله جِمَل ما فيه حوصَه ولا خِلّه
تدور اللّيال السّود والصّادرات اورُود
وتمشي علىٰ درب الشّقا يوم وتمِلّه
حبيب :
ترىٰ الحِمل في ظهر الجمل من عصر مشدود
ولاَ هُو بِزَينٍ اِلّه ولاَ هُو بِشَين اِلّه
وتاخذ نصيبك كان جَا يومك الماعود
وانا من يدوّرني علىٰ الِعزّ مِضْحِ اِلّه
مطلق :
تقوله ولا فكّرت في قبرك الملحود
وقبر الشّقاوي عادته يبلعه كِلّه
