ياسلام الله سلام كل منهاج يدله ..
سعد بن جدلان:
ياسلام الله سلام كل منهاج يدله
ناحرٍ طور الحجاز ويسبر القطب الشمالي
قوم يامطلق ولا تاخذ من القمرا مظلة
المطلة مالها ما جوب في بعض الحوالي
مطلق الثبيتي:
مرحبا ترحيب رجال يرحب في محله
مرحبا ياشاعر غالي وتجلب كل غالي
البعير ليا مشى فالدرب حبله مانتله
وان رغا ولا هدر لي ماقطرته في جمالي
بن جدلان:
كل يوم كاسبٍ لك بوك في الصندوق غله
نوب تاكلها حرام ونوب تاكلها حلالي
كل شيئا يالثبيتي ما يجي الا في محله
والف ولا الفين ماتحسب خسارة من حلالي
مطلق:
والله اني ماتفرج في رسوم فالمجلة
المجلة كلها فالسوق ماتسوى ريالي
انت لغزٍ ياطويل العمر مانقدر نحله
مايحلك غير عنتر عم ابو زيد الهلالي
بن جدلان:
كان ما عينت فالايام مدفاع تشله
يمكن يكسب نصيبك في مقاديم الليالي
كان كل النو مثلك يالمزون المستهله
لا نبي منها سحاب ولا نبي منها خيالي
مطلق:
زاد ملح البحر فالخفجي وحلقي كيف ابله
والعرب ماتتت وانا في هجرتي عايش لحالي
واحد ياخذ ويعطي في زمانه مانزله
مير به رجال ينصب قامته والجيب خالي
بن جدلان:
انت تبغى المال كله مير ضاع المال كله
مير انا رجال متحرص وحافظ راس مالي
يالثبيتي جعل راسك ما يخلا فالمذلة
مانويت اكرب حبالك وانت عمي وانت خالي
مطلق:
الكتاب اللي كتبته يم صفوى لا تفله
عارفين حروفها اللي كنها قوس الهلالي
انت تغشمرنا على مثلك ترى المعنى تعله
انت مثل الهيل ريحه فاح من صبح الدلالي
بن جدلان:
طوروها الناس لاهي حلة من فوق حلة
مير صارت ماتكدي لا عمام ولا خوالي