سلام ياهل الوفا والجود والطيب ..
مطلق الثبيتي
سلام ياهل الوفا والجود والطيب
اعداد نوِ توشى له بروقه
ياحمد تراالضيف في دار المعازيب
لو يتغلى كبيراتٍ حقوقه
احمد الناصر:
يا مرحبا فيك والله يعلم الغيب
يالشاعر الي جديدات طروقه
انت المخير بلا شك ولا ريب
ودك نقود الجمل ولا نسوقه
مطلق:
انا دخيلك من اهل الذيب والذيب
الي عليه يلحس في شدوقه
يا مكثر الخوف من حرش العراقيب
والي كمايه ضعيف تدوس فوقه
الناصر:
وش لون تدخل ولك بندق ترحيب
الي تصيبه مع الركبة تعوقه
احدٍ مدرب واحد يحتتاج تدريب
واحدٍ يشيل الطعام ولا يذوقه
مطلق:
الي يحب السلامة ما بها عيب
ماني منزل ذهب في غير سوقه
طويت بيتي وقلعت المناسيب
قدام غبر الهبايب لا تحوقه
الناصر:
الوقت اشوفه يودي علم ويجيب
رجلين مطلق ليا قفى سبوقه
الغيص وسط البحر في ذمة السيب
والطلح ما يشرب الا من عروقه
مطلق:
خل النخل يشرب الما وافتح الجيب
قدام تمره لا يابس في حلوقه
الصحبة الي بعد خبط المشاعيب
ماحدٍ براضي بها برقا وروقه
الناصر:
الي يدينه يقضبها المقاضيب
ماخاف من ذيب اهل لينه ولوقه
اعطيك كلمة مقطعة المطاليب
الشرع كم قص من يمنى شروقه
