طول الله عمر من شرف الحفل الكبير ..
مطلق الثبيتي :
طول الله عمر من شرف الحفل الكبير
مثل مبدا النور فوق الدير وجبالها
من ورد للبير ظامي وله حبلٍ قصير
ماشرب لو السواني درج محّالها
احمد الناصر :
جر صوتك والليالي باهلها تستدير
والله اعلم بالخلايق وزين اعمالها
اكثر العربان قلبه مثل قلب البعير
لو تمره سالفه روّحت في فالها
مطلق الثبيتي :
ياوسيع العرف لاتلبس الثوب الحرير
واحترص لاتحترك غترتك وعقالها
اكثر العربان قلبه كما قلب الغرير
مايسير الدم بين رِيْته وطحالها
احمد الناصر :
ياخساره كان حب العرب عود شعير
الضحيه يالثبيتي قريب هلالها
الجمل ساعات يرغي وساعه له هدير
مانبيها ياهل العرف تمشي حالها
مطلق الثبيتي :
مانبا ناكلك وانته سمن مدري مضير
ياكلونك ناس تزري تعشي عيالها
لاتحرك لاتحرك علينا يابعير
فردوك لحملةٍ لازمٍ تشتالها
احمد الناصر :
اكثر العربان اشوفه يروعه الصفير
مايدرج بالثقايل ياكود حمالها
يامعلم رح تعلم ويرشدك المدير
الشهاده غرتك طيب الله فالها
مطلق الثبيتي :
الليالي مقفيه والبحر عود غدير
والبواخر واقفه بالسرا باحمالها
الشهادة نعمة الله وسواها البصير
وانت ماتسرد على الناس روس اموالها
احمد الناصر :
يالثبيتي جعل فالك علينا فال خير
والسنه محسوبه ايامها وليالها
اسمعوني ياعتيبة ويا حضرة مطير
اكثر العربان دايم تعشق ضلالها
مطلق الثبيتي :
الله الي عالمٍ بالغناوي والفقير
والفقارى لاتعاند بنص ريالها
اسمعوني يالفوارس هل السيف الشطير
الثمامه خامده مايخل خلالها
احمد الناصر :
ياكبيرٍ عند نفسك على العالم صغير
طيع شوري واعذل النفس ياعذالها
مايهاجم ناس رجلٍ معه عقل وضمير
من عطا كلمه عطوه الرجال بدالها
مطلق الثبيتي :
اقلب الموجه وعذره من الدرب العسير
وانت ابوها ياحمر العين ولا خالها
مانبا منكر يعذبك مع سادة نكير
وانت من ناسٍ تشيل التمر باحثالها
احمد الناصر :
المصخن ينسدح ياعرب فوق السرير
والخلايق ربك الي يزيد اهبالها
مامعك جنحان ياطير تنهضها تطير
الله الله ياعرب قالها الي قالها
مطلق الثبيتي :
التجاره رابحه مامعك فيها خشير
مير وان ضاقت عليك الدروب اصحا لها
لاتسرحها جمال وتضويها حمير
وانت مانته لا وراها ولا تبرالها
احمد الناصر :
طيع شوري يالثبيتي تخير وتستخير
قبل افصل فوق جثّتك كل ابدالها
التجاره صنعتك وانت بالصنعه خبير
علمك جدك ودخلك مع مدخالها
مطلق الثبيتي :
ودي ازعل سميره ولو يزعل سمير
ماعليّه من خرزها ولا خلخالها
انت ابو زيد الهلالي ليا قر القرير
وان حمست الشاذليه حكرت دلالها
احمد الناصر :
لاتحيرها مع الدرب يالشاعر تحير
مثل غرقان الركّيه تخمّش جالها .