سلام الله على شيخ نصيناه ..
مطلق الثبيتي:
سلام الله على شيخ نصيناه
وجينا له من الدار البعيدة
وزراع على السكة لقيناه
يوصل من حديدة في حديدة
شليويح المطيري:
هلا يا مرحبا بالي دعيناه
وجانا فالوعد حسب الوعيدة
نبا نقرا على عدٍ صفى ماه
واعرف الخط في سطح الجريدة
مطلق:
كتابك يالبخاري قد قريناه
ولا ادري تنقصه ولا تزيدة
وانا ما احسبك ترجع يم مرباه
وتبدع له طواريقٍ جديدة
شليويح:
نعرف نعالج المرضان بدواه
وبعض امراض مافيها شريدة
وطيت السوق مالي فيه مقضاه
لكنك منت داري بالعقيدة
مطلق:
يبس عودٍ من اول كنت تلحاه
وعود مثل مسواط العصيدة
على هونك وحدك لا تعداه
وخلك فالصداوي والفريدة
شليويح:
حليلك يالبعارين المثناه
تحت راي النبش في ولد عيده
خطرتك وان ما عندك ولا شاه
تطلع من قصيدة في قصيدة
مطلق:
تقوله وانت قلبك فيه حماه
على قلبك كما نار الوقيدة
ترا ذيب يج الناس بعواه
يسفر يم صنعا والحديدة
شليويح:
سقاك الغيث ياعدٍ وردناه
لكنه شام من هاك البديدة
حفرت القبر والميت دفناه
عسى ميتتك يالمسلم شهيدة
مطلق:
كسر عضمه بنفسه ما كسرناه
ويوم العيد جعل الله يعيده
ترا من لاح وسمه فوق علياه
حياته تنقضي ماهي سعيده
شليويح:
ابو فيصل كتب خطه ويمحاه
وانا عارف حميد من حميده