سلام والايام يا مطلق على غيض و رضا ..
عايض ابو رجيله:
سلام والايام يا مطلق على غيض و رضا
للي ركب في شدادها والي ركب في ردوفها
الله على وقت بقي والله على وقت مضى
ليت الليالي وحده في اشكالها و وصوفها
مطلق الثبيتي:
يا مرحبا والارض نقطعها على عوص النضا
لو الفوارس دونها قامت تسل سيوفها
الروح لا تحرص عليها ما تفوت عن القضا
والموت لو يمهل لها لابد يوم يحوفها
ابو رجيله:
انزلي ليا قاع يالبحر واطلعي ليا سطح الفضا
يالابة ضني يوافق ضنها واشفوفها
ماني مبدي فالقضية حولت عند القضا
والشيخ يعرفها ويعرف رمزها وحروفها
مطلق:
كف القدم وارتاح لا تاطا بها جمر الغضا
ريح سواتي والمطيه لا تخبط كتوفها
كم واحدٍ غلق زمانه من زمانه ما قضا
والناس مانقبل جمايلها ولا معروفها
ابو رجيله:
لن صار نقص وزود تال الوقت للحق فرضا
واهل الحلال الطيبة تبدي وفا لضيوفها
الصقر ابا الجنحان يكفخ بالجناح وينهضا
ما اغضى بعينه والطماعه من بعيد يشوفها
مطلق:
بعض الدروب الي تباها دون شوك وعضا
لكن خل الرجل تثبت فاللزوم وقوفها
اكسر صناديق الذهب واعطيك يازيني رضا
عساك ترضا بعد اخذت مياتها والوفها