الليلة المعنى على راسك يابو ذيل ..
مطلق الثبيتي :
الليلة المعنى على راسك يابو ذيل
يالحصني اللي ماتعلمت السياسة
ان طعت شوري بعدها لاتسري الليل
الذيب الاشهب يحتريك يهز راسه
جارالله السواط :
انا عميلك يالثبيتي واوفي الكيل
لا تلمس الكهرب ويحرقك التماسه
هذا الزمان اعور وشاهدنا التهاويل
لا تحسب المعنى حليب بجوف طاسه
مطلق الثبيتي :
اللي رقد في بطن وادي شاله السيل
مير احترص والطرف لا يكثر نعاسه
ياللي عيونك كنهن عيون دربيل
لا انت بريّس ولا راعي رياسة
جارالله السواط :
جنبي قوي وادحمك لي حيلة ولي حيل
واليا بنيت البيت وثقته بساسه
انت رجل لكن قدامك رياجيل
كلن يفصل بدلته على مقاسه
مطلق الثبيتي :
في مامضى ضليت تغرف بالزنابيل
واليوم منت لاحقٍ لو نص كاسه
ياويلكم ياهل الشفا ياويلكم ويل
من يوم عدتوا للصرام وللدياسة
جارالله السواط:
في مامضى نرويك من بنٍ ومن هيل
ياولد عمي يستر المعنى لباسه
(ياذيب لاتامن) من اهل القال والقيل
وان طعت شوري حط لك مكتب وماسه
مطلق الثبيتي :
ياللي شواك الحب ودموعك هماليل
الحب ماتعرف ذهبه ولا نحاسه
ياقلّت الصاحين ياكثر المهابيل
والكل منهم لا اعترض للعلم حاسه
جارالله السواط :
نضرب لك الامثال وانت هات تمثيل
ما اجلس مع الانجاس واصحاب النجاسه
بنت الهوى بالفن زعلانة على هذيل
وانا هواوي ومتعلم للحراسة.
