سلامَ الله سلامٍ يرفعَ الرّاس ..
مطلق الثبيتي :
سلامَ الله سلامٍ يرفعَ الرّاس
وابى اَمِدّه لَلاقصى والموالي
انا في خاطري معنى وهُوجاس
اَكِنّه لَينِ حتّى سَمّ حالي
مستور العصيمي:
هلا فالحفله اللّي لمّت الناس
على سِبلَ الرّجالُ وعِلمِ غالي
علومك ما لها تحديدِ وقياس
تِكافحّها على طُول اللّيالي
مطلق :
لِيَا فكّيت قيد اِشعَيلِ لا باس
وابى انزّلكِ في رُوس العوالي
وِلٍن جا في ضميرك عِلمِ وسواس
اَبَى اَخلّيكِ واسري مع جمالي
مستور :
ما افكّ اِشعيلِ لين اِدّقّ الاجراس
وتعرف مكسبي من راسِ مالي
ترى بعض الدّعاوي ما لها ساس
ولا فيها مَحايل وِاِحتيالي
مطلق :
اَبَى اعطِيك الذّهب وِافصُوصه الماس
وسيف الشّيخ ابو زيد الهلالي
اخاف الكهربه تقرِب من الماس
وتالَع فِيكِ يا عمّي وخالي
مستور :
انا ماني لِثوب النّقصِ لبّاس
ويغنيني على الدّنيا حلالي
ولا يرضى بهذي رَجلِ حَسّاس
ومن حَطّ العِمامه والعِقالي
مطلق :
اَبَى حظّك يفوزُ وياخذ الكاس
ويَسلَم من تهاويل اللّيالي
انا ما جبتِ لِك قصديرِ ونحاس
انا جبت الوفا والحَظّ عالي
مستور :
يا بِعدَ اللّي تلَمّسها تِلِمّاس
كِما بِعدَ الجنوب اِعنَ الشّمالي
ترى ما يَبديَ اَلاّ قلع الاضراس
وعَلّم واحِدٍ دالِه وسالي
مطلق :
حلُوق النّاس يا مستورِ يبّاس
يَبَونَ الشّرب مِن عِدٍ زلالي
لو اِنّ النّار تِشعِلها بمِقباس
اخافِ اِنّ القمر يرجَع هلالي
مستور :
علومِك يا الثّبيتي مِثلَ الامواس
وانا ما اشُوف لِك فيها مِجالي
عسى مِن لا يدُوسَ الرّاي ينداس
ولا تفتح لِنا فيها سوالي
مطلق :
انا ما جيتكُم طِرقي وعَسّاس
اَبَى ادرِجها كِما دَرجَ المَحالي
لكنّك صِرتِ مِثلَ العُودِ والفاس
وانا مِثلَ العسَل صافي وحالي
مستور :
وراكِ اِتروحِ بنٍ جَوفِ مِحماس
على شانَ الغشيم اِبن الحَلالي
ورى يا بِن حِمَيّد تِضرِس اِضراس
مِعِك جَزعه وفزعه ما تِبالي