اخذ الحربي على دربي ضحى واطق راسه
مطلق الثبيتي:
اخذ الحربي على دربي ضحى واطق راسه
في حصاة رزاح ولا في حصاة فالملاوي
يدحم الريس ولا قيس وطامع فالرياسة
دلله ياميشع الشاعر ترى صاحبك غاوي
صياف الحربي:
ما يغش ناس غار الوقت الاقشر وانعكاسه
وانت يوم انك تصيح وتعتزي وايش انت ناوي
الثبيتي لو يشوف الجمر بالرجلين داسه
ثم راح لغرفة الدكتور يبغى له مداوي
مطلق:
اجتمعتوا يالحروب وكل حربي جاب فاسه
مير ريسكم على شط البحر طاح متساوي
والثبيتي لو يضيق ويعتزي ياقو باسه
يعرف الذيب السروق اللي عياله ماتخاوي
صياف:
اجتمعنا تحت بيت ثبت الرحمن ساسه
وانت ما ضويت للعتبان ما غير البلاوي
الثبيتي ما صحى قلبه ولا غلق نعاسه
مير بكرة يزهم القاضي ويعطيه الرشاوي
مطلق:
راعي البشت الحساوي كل علم زين حاسه
يا خسارة سكبة المرزام والبشت الحساوي
السياسة يالحريبي خلها لاهل السياسة
وانت خلك واحد بين المطاعم والقهاوي
صياف:
انت ذيب وجاك ذيب يفجع الناس افتراسه
من حزامي يا اخر الايام تقضيها خلاوي
قمت في سموع الناس من كثر الحماسة
تحسب انك راعي الصفراء شليويح العطاوي
مطلق:
تقرب من النار وانته زبدة في وسط طاسة
والعرب تاكل قفار وذيبها فالضلع عاوي
غير الماطور يا صياف مدوخني حساسه
وازهموا زيني رضا ولا ازهموا ولد الزواوي
صياف:
انت فرغت الصحون ولا بقى غير اللحاسة
واطعموا فيك العبيد السود والبدو الشواوي
لو تغير نيتك وتحط كرسي وماصة
خير لك من دلوك اللي لا حبال ولا عراوي
مطلق:
لا تعاندني تراني راس ماتعرف عطاسه
اقلع الخيمة من الزيمة ليا خان القناوي
انت لو انك من اهل المفكرة واهل الفراسة
كان ماتخفي زكاة المال حيث انك غناوي
صياف:
جبتنا عساس دار ولا ربحت من العساسة
مالقيت الا جبال حمر وشعيب سناوي