يا سلامي على شيخٍ وِصِلنا بلاده ..
مطلق الثبيتي:
يا سلامي على شيخٍ وِصِلنا بلاده
شيخِ نعرف جدوده من شيوخ الجزيره
وِان نقص شيّ بالمعروف والطّيب زاده
نور شعب الكويت وعَمّ الاسلام خيره
مفرح الضمني :
مرحبا عِدّ ما هَبّ النّسيم اِبّراده
البلد هو بلادك واللّيالي نويره
ما تعرف الرجال اَلاّ بحسن الاراده
داركم دارنا والكل يعرف مصيره
مطلق :
يا مفرّح صِحِيبك ما ينزّل شِداده
لين حتى ينوّخ جوفِ دارك بعيره
ما حَداني عليك اَلاّ البلا والقرادَه
وانتِ طوّلتها من بعد كانت قصيره
مفرح الضمني :
سِق بعِيرك وقصّر يا ثبيتي قِياده
كاسِب اِلّك عذابُ وكاسِب اِلّك بِريره
انت قضيت عمرك ما كتب لك سعاده
دوّر اللّي يحبّك يا فتى واستِشِيره
مطلق :
انت عينك بجنبك مثل عينَ الجراده
كلّ يومٍ رَحاتك فوقنا مِستِديره
ولع النار واِشعلها وتصبح رماده
ما معك في عتيبه يا المطيري بصيره
مفرح الضمني :
ان مزحنا معك يا شيخ فالمزح عاده
وان زعل صاحبك معروف شره وخيره
الثبيتي شجاعٍ ما توَنّي جواده
كل يوم على العالم يطرّش نذيره
مطلق :
اَحمِدَ الله بخيرُ وتحت راسي وِساده
لو تغني لهم نوره وترقص مِنِيره
يا مفرح ترى فالصلح خيرُ وفِياده
لا تغشمر على الشيطان ويدِقّ زِيره
مفرح الضمني :
يا الملكع تبى فالعلم نوع انفراده
خلها خافيه عين البنا ادم بصيره
ما نصلي وراك ولا نبي لك عباده
تظهر القطن وِاِتخفّي علينا حِريره
