يا مرحبا عد ما تذري هبوب الرياح ..
مطلق :
يا مرحبا عد ما تذري هبوب الرياح
في حلّةٍ تنشط الخاطر رياجيلها
في حلة للمسير مثل جم قراح
لو كان ما هي قراح اقفي ولا اجي لها
صياف :
عسى البقى بالعميل اللي يسلّ السلاح
اما مشى قدمها والا يباري لها
يا الفارس اللي تقوم اليا سمعت الصياح
ما كل دله نقرقع لك فناجيلها
مطلق :
انا احسب انّك من البارح تسل الرماح
لكن دنياك ما شِفنا محاصيلها
الناس قامَت تشب النار والقدر فاح
لكنّ جتهم سحابه يدّرج سَيلها
صياف :
من يوم قالوا نبت للطّير ريش وجناح
جهزت له بندقٍ ما هو بصاحي لها
يا كثر حوم الذيابه والغنم فاامراح
لكنّ ربعك عتيبه ويش اسوّي بها
مطلق :
ما به سلامه ولا به غير سمٍ ذحاح
واُمّ (البنيّه بتومِي) لِك بمنديلها
يا زين وجه الطّبيب اللي يداوَ الجراح
لوّ المريضه على الهضبه يعدّي لها
صياف :
انا زبون الكتاب اِليَا ضمنت النجاح
واللّي يصلّي لخلق الله يصلّي لها
انته تغيّرت من راس الطّلي يومِ طاح
واهلَ المدينه تِسلّط لك درابيلها
مطلق :
يا ليت صياف من بعض العلوم اِستراح
ما اتعب شيوخ الحروب ولا مراسيلها
واللهِ لو كان اشوفك جوف حزمٍ براح
لَ اَتقومِ بين الصّفوفِ ولا تغنُي لها
صياف :
ما عند ربعك ثِبيت اَلاّ البكا والنّياح
كيلو تمر وَيش اَشيلِ وَيش اخلّي لها
انا احسب انك من اول من طيور الفلاح
واثرك ترمي لك القشرا وترمي لها
مطلق :
انا عطيتك كلام الصّدق ما هو مزاح
لكنّ كسّرت فالحلّه معاميلها
قرن يناطح وقرن ما يحب النطاح
صابر على هِجرةٍ ما اكثر غرابيلها
صياف :
ماني مسامحك لو دوّرت عندي سماح
ابليس حرك ذلوله وارفعت ذيلها